«هوووبا»: 1 2 3 4 .. بقلم عمر عبد الله

«هوووبا»: 1 2 3 4 .. بقلم عمر عبد الله
عمر عبد الله
عمر عبد الله
عمر عبد الله

1

أنا اللي صبري عدى كل الحدود

أنا اللي بين الناس موجود ومش موجود

بدور جوه نفسي على كل معاني الحياة

أصل حبل الأمل في روحي على آخره مشدود

اللي راح بالنسبالي مش أكتر من ذكرى

وأنا بطلت أفتكر إمبارح من فترة طويلة

و جمال الدنيا قدامي مش أكتر من فكرة

حاولت أغير إمبارح بس ما باليد حيلة

تلت تربع شوقي مش على مال ولا منصب

أصل لا المنصب بيدوم ولا الفلوس بتخلد

الحب هو الأصل في بحر محتاج مركب

بس الحب الحقيقي – مش اللى بنشوفه متقلد

فى الآخر بقول حتى الشمس بتيجي وتروح

الدنيا مش ثابتة على حال ومسير الأمور تتعدّل

ده الحزن مهما طوّل في القلب مسيره يموت ويروح

وبين الـ كاف والنون كل الحياة تتبدل

2

مش فاهمهم و كأني أول مرة أعرفهم

كأنى أول مرة أتكلم معاهم – ده أنا كل يوم بقابلهم

مين فيهم حاسس اللي جوايا و مهتم

محدش فاضى أحكيله مع إنّي كنت دائمًا بسمعهم

و برغم اني بضحك لكن قلبي دائمًا حزين

مش فاكر امتى بفرح يمكن كل فين وفين

لأن المشكلة أن محدش حاسس فيهم بمشكلة

وأنا مش طالب غير صديق مخلص  وأمين

اللي أعرفه من سنين هو اللي بيخون

تلاقى منه اللي عمرك ما اتخيلته يوم

في لحظة اختيار حر هتكتشف انه شيطان فى صورة بني آدم

و اللي أفتكرته هيقف جنبك يبقى سبب كل الهموم

3

اللهم لا أعتراض على حكمك و قضائك

أنا العبد الضعيف سلمت ليك امري

ده العمر كله ليك وأنا عايش بس عشانك

ولو كان العمل مكتوب فحبك يارب قدرى

ياللى دعيت ليك دعوة المغلوب

و نصرتنى رغم ضعفي وقلة حيلتي

يارب يا ملك ياجبار يا مقلب القلوب

ثبت قلبي على حبك وخفف عني حيرتي

خلينا نشوف الصح والغلط أكشف كل الحقيقة

ده الغلط دخل في الصح وكتير فعلاً أتلخبط

رجعنا لطبيعتنا الأولى الرقيقة البريئة

تهنا فى الطريق وبقينا على الدين بنتنمرد

و لو ضليت يارب اغفرلي و أسترني

ورجعنى لطاعتك وخلي الإيمان يغمرني

قويني على نفسي على شيطاني قويني على اللي يعصيك

دي الدنيا كلها وأنت معايا مش ممكن يوم تقهرنى

4

احساس بالغربة جوايا بيني و بين نفسي

و مع أن كل اللي حوليا قرايبي وحبايبي

حاسس أني واحد تانى مش منهم

أكتر وقت بحس فيه براحتي و أنا لوحدي

بحلم أرجع طفل صغير وألعب مع تيتة بلعبى

كنت فاكر إني لما أكبر العالم كله هيبقى فى أيدي

و كبرت و قلت سعادتي و زادت الوحدة على قلبى

يمكن العيب فيا مش فيهم مش عارف

بس أكيد احساسي ده مش من فراغ

الوحدة طريق ظلمة طول الوقت فيه خايف

أنا لازم اتغير بلا وحدة بلا قرف بلا وجع دماغ

العمر أيامه معدودة والثانية متتعوضش

و مين عاش مخلد وعمره لسة مخلصش

دى الحياة فيها ألوان كتير غير اللون الأسود

و اللى ميعرفش ده يبقى للأسف مبيشوفش

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *