«هوووبا» : شرفتونا ونورتونا 1 .. بقلم عمر عبد الله

«هوووبا» : شرفتونا ونورتونا 1 .. بقلم عمر عبد الله
عمر عبد الله
عمر عبد الله
عمر عبد الله

أهلا بيكو فى مصر…
يارب تقضوا وقت جميل عندنا، آه الأستاذ اللي ورا.. معلش أنا آسف التكييف مش شغال، مدفعناش الفاتورة، آسفين يا فندم.. آه يا فندم هي الكهرباء غالية اليومين دول، هي أينهم بتقطع نص النهار والنص التاني بتيجى ضعيفة، بس إحنا أحسن من غيرنا يا فندم .

المدام اللي ورا، أفتح الشباك ؟؟ ، معلش يا مدام مقلب الزباله جنبنا والعربية مجتش بقالها إسبوع ، و مع اننا بندفع كهرباء زيادة مع أنها مبتجيش،و بندفع كمان للزبالة مع إنها مبتتشلش بس إحنا مبسوطين و ميت فل و عشره .

أنا بعتذر للفوج كله إننا مقدرناش نوفرله أتوبيسات، أصل فيه إضراب حضراتكوا والسواقين قالعين ملط جوه الأوتوبيسات، وحتى لو مفيش إضراب، مفيش بنزين، عشان كده إحنا انهارده هنلف القاهره كلها على رجلينا وأهو منها رياضه برضوا «ههههههههه» «ضحكه صفرة مستفزة، عرفت الفوج كله أن المرشد السياحي عامل حشو فى ضروسه اللي ورا» .

عايزين حضرتكوا تتأكدوا أن اللي هتشوفوه عندنا مش هتلاقوه فى أى مكان فى العالم،
«وقفوا عند عربيه ترمس»
و حضرتكوا الترمس المصرى من أجود أنواع الترمس فى العالم، بيشفى من كل الامراض، و بيرجع الحيوية والشباب للبني آدم، و يا حاجه ماري انا وصيتلك على ربع ترمس مخصوص ،
المرشد لصاحب عربيه الترمس : بكام ده ؟
ده يا بيه ب 3 جنيه ..
المرشد للفوج : 5 دولارز

طبعا ما شفتوش ده بره
«بلطجى مثبت واحد و رافع عليه مطوه»
Oh my god , what is this ?
ده يا ريس توم كرم المصريين، الراجل ده عايز فلوس والتانى بيتحايل عليه عشان يديله، قام التاني الأسمر ده رافع عليه ال knife و مصمم ليديله فلوس، بس أنا بقول نمد ليجيلنا يدينا فلوس إحنا كمان ولا حاجة.
«الفوج كله بيجرى»

وبيعدى الفوج على طابور عيش والناس مقطعة بعض..
Oh shit , they are killing each other
هههههههه «نفس الضحكة الصفرة»
لا يا حاجة أم مارتن، أنا هقولكوا ده ايه،
مش انتوا عندكوا الـ WWF أهو احنا بقى عندنا WWC ، دول مصارعين كلهم، حتى أبو جلبية ده، واللى بيكسب بياخد حزام، بس إحنا الحزام بتاعنا بيتاكل.

فاتوا جنب عربية كبده ،
صمم المرشد يجبلهم كبده ،
«والنبى يا باشا ، 30 شندوشت كبده»
كله هياكل، كله هيتبسط
بمجرد ما الأجانب كلوا الكبده، اللي يغمى عليه واللي يرجع واللي يجيله مغص و يعملها على روحه، المرشد شاف كده، قام مشاور لميكروباص وحاشرهم فيه و طالع على الوحده الصحيه اللى فى الضرب الاحمر .

جوه الوحدة
المهم الحاجة ثامنثا و قعت ما قملهاش منطق  أول ما شافت المنظر ده ……. يتبع

التعليقات