«هوووبا»: سبايدر مان VS فتلة .. بقلم عمر عبد الله
عمر عبد الله

 

عمر عبد الله
عمر عبد الله

مين قال إن مصر معندهاش أبطال خارقين ؟ بالعكس بقى لو أمريكا في بطل أو أتنين أو حتى عشرة فمصر بلا فخر كل سكانها أبطال خارقين .
إيه الفرق يعني بين سوبر مان والموظف اللي بيقدر يعيش نفسه و عيلته كلها ب 200 جنية في الشهر ولا بيطير ولا بيلبس البوكسر فوق البنطلون !!
باتمان ولا يفرق أى حاجة عن سواقين الميكروباص، بالعكس بقى سواق الميكروباص عمل اللي باتمان معملهوش – و كفاية أنه حول «حلتين» و «موتور غسالة» لوسيلة مواصلات ينقل بيها آلاف المواطنين، عشان كده أنا قررت أعمل مقارنة بين «سوبر هيرو» أمريكي و «سوبر هيرو» مصري.

سبايدر مان VS فتلة

أول حاجة لية اخترت سبايدر مان؟
لأن سبايدر مان مر تقريبا بنفس ظروف تلت تربع شباب مصر، شاب صغير– واد «ورور» لسه ما دخلش دنيا بعد ما خلص جامعة، اطلتم و كان مأجر شقة نص لبة، أشتغل في محل بيتزا وكانت حالته ضنك و حبيبته كان معجب بيها صاحبه الغني حتى «الفسبة» اللي حيلته أدشدشت فى الجزء التاني، و لولا إن عنكبوت عضه – و العضة دى خلت «بيتر باركر» اللي هو «سبايدر مان» يتحول لسوبر بني آدم و أخد خصائص العنكبوت و بقى بيمشي على الحيط و بيطلع شبكة يتنطط عليها بين العماير – نفس النموذج ده – عندنا منه هنا فى مصر.

البطل الخارق بتاعنا إحنا بقى حاجة كدة بلدي، الواد فتلة ابن حسنية بياعة الخضار.
و لو كان سبايدر مان عضة عنكبوت و أداله قدرات خارقة، فالواد فتلة عضة كلب بلدي و من يومها و هو ماشي «يهوهو» على الناس «قدرة خارقة أهي» .

هتقوللي سبايدر مان جسمه متقسم و عنده عضلات و بتاع .. هقولك ولا يجي حاجة جنب فتلة.. الواد بسم الله ما شاء الله عليه طوله متر ونص و عنده أنميا حادة بس إيه جن، هو حرامي غسيل المنطقة بتاعته، هواية بيمارسها فى وقت فراغه.. في الخناقات بينزل يتلم عليه مش أقل من عشرة بيضربوه علقة ولاااا بيأثر معاه، إنما سبايدر مان هو يادوب واحد و بيطحن على بال ما يقدر عليه .

فتلة أشجع من سبايدر مان، هتقوللي إزاي ؟ هقولك سبايدر مان بيلبس وش عشان محدش يعرف هو مين، فتلة بقى غيره خالص –طول الوقت عريان، لأنه معندهوش حاجة يلبسها أساساً.

لو كان سبايدر مان فى مصر كان عرف يعمل حاجة ؟؟؟

لأ طبعا ولا كان هيعرف يحارب جريمة ولا يمشى فى الشارع حتى .. ده واحد محتاج على الأقل عمارة 100 دور عشان يعرف يتشعلق و يتنقل من مكان لمكان – و إحنا عندنا أطول برج 11 دور و هما 3 – 4 اللي في مصر كلها، يعني لو راح الأرياف هيتقطع عيشه والناس هتجري وراه بالشباشب ده لو متمسكش و نقلوه العباسية .

فتلة معاه توكتوك بيقضي بيه مشاويره و بيشتغل عليه كمان- هو أينعم سارق التوكتوك بس أهو أحسن ما يقعد على القهوة.
بالذمة لو مخبر شاف سبايدر مان هيسيبه، طب لو سبايدرمان حب يرتبط بواحدة هيقول لأبوها إيه ؟ «و الله يا عمى شغال في محل فطير الصبح وعنكبوت بعد الظهر» ؟ و خطيبته لو عايزة تجيبله هدية تجبله إيه ؟ «بيروسول».

خلاصة الكلام  ومن الآخر لا تقولي سبايدرمان ولا جريندايزر ولا المحقق كونان، إحنا شعب خارق للطبيعة، إحنا 90 مليون سوبر هيرو، إحنا اللي دهنّا الهوا دوكو و عملنا البحر طحينة و «قلبنا اللنش سفينة»، إحنا المصريين و «شطب يور ماوس أوباما» .