«هجيب هدية لنفسي وافسحني».. شعار السناجل في عيد الحب

«هجيب هدية لنفسي وافسحني».. شعار السناجل في عيد الحب
valentine-jewelry-540
عيد الحب
عيد الحب

«أنا هجيب هدية لنفسي وافسحني»، عبارة انتشرت بين السناجل، ردًا على سؤال هتعملوا ايه في عيد الحب بما إنكوا سناجل؟، فكلمة سناجل في حد ذاتها بتغضب البعض، وخاصة في ظل قرب يوم عيد الحب، فأصبحت الشوارع مليانة قلوب حمرا، ومحلات بها دباديب ومجات وهدايا عيد الحب، وحفلات لنجوم كبار مناسبة عيد الحب.

فعيد الحب، هو المناسبة التي يحتفل فيها المرتبطين في جميع أنحاء العالم، فهو يعتبر يوم تقليدي يعبر فيه المحبون عن حبهم لبعضهم، كما يعتبر من أعياد الرومان الوثنيين، حيث كان من مُعتقدات الرومان أن رومليوس مؤسس مدينة روما، هو الذي أرضعته ذات يوم ذئبة فأمدته بالقوة والفكر.

فأصبح الرومانيون يحتفلون بهذه الحادثة في منتصف شهر فبراير واليوم الرابع من نوفمبر من كل عام، وكان مراسيمه هو ذبح كلب، ودهن شابان جسمهما بدم الكلب، ثم يغسلان الدم باللبن، وعلى هذا التصق اسم القديس فالنتين بعيد الحب، وأصبح الرومان يحتفلون بها دائمًا، إلى أن يصبح عيد أساسي في جميع أنحاء العالم.

ومن جهته، وردًا على سؤال هتعملوا ايه في عيد الحب بما أنكوا سناجل؟، وبالفعل جاء السؤال على الجرح، حيث قالت هدير مصطفى هبكي على حظي المنيل، وهحب نفسي، وأقولها هابي فلانتين داي يا بيبي، أما عن صديقتها أميرة جمال قالت: بصي أنا مش بعمل أي حاجه، أنا هأكل خس وجرجير، أصل هو يوم عادي زي أي يوم بالنسبالي لاني أصلًا ماليش في جو السهوكة ده وبعدين أكتر الناس اللي بتحتفل بعيد الحب ده ناس مرتبطين من ورا أهلهم يعني حاجه حرام فبالنسبالي اليوم ده ملوش أي 30 لازمة وبعتبر الناس اللي بتهتم بيه ناس دماغها فاضيه.

وقالت منار مصطفى : أنا هنزل الجامعة وأقعد اتفرج على الحبييه وأضحك عليهم وهبسط نفسى بأي حاجة، وهقول للي بحبهم كل عيد حب وأحنا مع بعض، بينما أضافت مي سليمان أصلًا اليوم ده حرام والحب حرام والارتباط حرام وعيب ملناش دعوة بيه.

كما قالت أمال أحمد هجيب ترمس وهعمل كاكاو وهقعد في البلكونة واتفرج على الناس وهي رايحة تجيب الدباديب، ودعاء محمود، أوضحت بصراحة وبما أنك سألتيني سؤال محرج وهتخليني أجاوبك بصراحة، فبسم الله الرحمن الرحيم، أنا في عيد الحب بفضل أحقد على كل الحبيبة، وياسلام لو كنت اليوم ده في الشارع وشوفت الهدايا والدباديب الحمرا، هفضل أدعي عليهم يتقفشوا بالهدايا واحقد عليهم، وبدعي اني يجيلي هديه مش عارفة من مين بس المهم تجيلي ولما بشوفهم ماشيين مع بعض بالهدايا بقول في سري طبعًا يارب تسيبوا بعض لو مجبتليش هديه زيها.

وسحر أحمد قالت : ولا أي حاجة هقعد أدعي عليهم بقنبلة من عند إسرائيل، وقال حسام القاضي أنا هجبلي هدية حلوة أصلي بحبني أوي وربنا يخليني ليا وميحرمنيش مني أبدًا، وأحمد عطية قال: هتحسر على حالي.

بينما قالت سارة عبد الفتاح: هعمل كيك وهجمع صحابي ونحتفل بعيد ميلادي عشان لسه معملتوش، كما قالت ميادة محمد هعمل عيد ميلادي أيضًا، وأحمد علي قال سينجل سينجل ولا يهمني، وهلبس أحمر وهنزل احتفل بردو، كما قالت تقوى محمد أنا بجيب هديتين لساسو وياسمين، أقرب صاحبتين ليا، عشان عيد ميلادهم في اليوم المنيل ده.

وأخيرًا، يسرا عبادة قالت هو يوم مقرف أصلًا زي بقيت أيام السنة، ارتباط ايه وجواز ايه هي ناقصة قرف، وقالت مهرمان أحمد هتحسر على نفسي، وهشغل أغاني حزينة.

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *