«ليجو» : من بعيد.. أماني عماد

«ليجو» : من بعيد.. أماني عماد
أماني عماد
أماني عماد
أماني عماد

في الدنيا دي في حاجات بتبقى أحسن لو فضلت بعيد ..

ممكن تكون بتحب فنان مشهور، ولو صادفت وشفته في الحقيقة تلاقيه مغرور مثلاً وتكرهه .. ممكن تكون بتحب كاتب عظيم، لكن لو اتعاملت معاه في الواقع تلاقيه متناقض وبيتصرف تصرفات عكس اللي بيقوله بقلمه.. ممكن تكون شفت صورة حد وحبيته من صورته وترسم لشخصيته صورة معينة في خيالك، لكن لما تعرفه وتقابله وجها لوجه، الصورة اللي انت كونتها دي تتشوه، وتتفاجئ إنه حد تاني خالص غير اللي انت كنت فاكره.

في بعض الناس ممكن يجيلها وقت تبقى مخنوقة من المشاكل اللي في حياتها، فبتفضل في الوقت ده تبعد عن معظم الناس باختيارها .. لأنهم بيكونوا مش مستحملين أي ضغوطات زيادة وشايفين إن الناس دي ممكن متكونش فاهماهم، فبيدّوا لنفسهم وقت مع نفسهم أكتر من غيرهم. وفي ناس تانية بتقرر إنها هتبعد لأي سبب كان .. فقدان الثقة أو التعرض لمواقف مش متوقعة من الناس دي أو حتى مبقوش يستريحوا في وجودهم.

وفي ناس تانية بتبعد غصب عنها .. ظروف سفر مثلا أو ضغوطات في الشغل أو أيا كان السبب.

لما الناس بتبعد عن بعض باختيارهم أو غصب عنهم، في حاجات كتير بتبقى أوضح .. بيبان حياتهم من غير الناس دي أحسن ولا أوحش .. بيبان قيمتهم عند غيرهم وهل غيرهم مهتم بيهم في بعادهم ده ولا لأ؟ .. بيبان ترتيب الناس في قلوبهم بيبقى شكله إزاي .. وحاجات تانية كتير.

الفكرة كلها بقى في اللحظة اللي الناس بتقرر فيها ترجع تقرب تاني .. هل غيرهم هيبقى متقبل منهم ده؟ هل هيعذروهم؟ هل هما كان عارفين ظروفهم فهيفرحوا إن دلوقتي أحوالهم بقت احسن ورجعوا كويسين معاهم؟ هل هيبقى خلاص اتعودوا على عدم وجودهم في حياتهم وصعب يتكيفوا معاهم تاني؟

الناس القريبة نفسها .. امتى تقدّر إن أصحابها محتاجين شوية وقت بعيد عن كل حاجة .. وامتى تعرف إنهم بيقولوا كده بس لكن عاوزينهم يفضلوا برضه يسألوا عليهم. على قد ما الموضوع معقد بس فيه تفاصيل بسيطة بتفرق في العلاقات بين الناس.

اللي يتقدر فعلا هو اللي بيهتم بيك وانت بعيد، بيردلك غيبتك، بيبقى موجود لما ترجع. هي دي الناس اللي وجودها في حياتنا فعلا ميتعوضش.

المهم في الموضوع إن الواحد ميتصرفتش تصرفات اعتمادا على إن هو بعيد! ميبنيش لنفسه صورة الناس تشوفيه بيها من بره تنبهر، وهو أبعد ما يكون عنها، ميسخنش اتنين على بعض من بعيد ويرجع يقول “وأنا مالي؟”! ..ميحكمش على حد من بعيد وهو متعاملش معاه في الحقيقة.

البعد ساعات بيزود المحبة بين الأشخاص وساعات بيقضي عليها خالص .. مفيش حاجة في المطلق لأنه مسألة نسبية بين الناس باختلاف مشاعرهم واهتماماتهم ولأن في أساساً حاجات لو فضلت بعيد كده هتتحب أكتر من لو كانت قريبة. بس في أوقات بيحصل إن حد يبعد، نتيجة البعد ده عليه وعلى الناس المحيطة بيه ورد فعلهم على ده هو اللي بيحدد إذا كان البعد ده هو نهاية العلاقة بينه وبين الناس دي ولا لأ.

التعليقات