بالفيديو :«في حوار تخيلي» ماري منيب: أحب ليه وعلشان إيه أحب .. بلا نيلة!
ماري منيب
ماري منيب
ماري منيب

كتبت :أماني عماد

هي‭ ‬أشهر‭ ‬حماة‭ ‬في‭ ‬تاريخ‭ ‬السينما‭ ‬المصرية،‭ ‬مفيش‭ ‬منها‭ ‬اتنين،‭ ‬خفة‭ ‬ظل‭ ‬مش‭ ‬طبيعية،‭ ‬من‭ ‬غير‭ ‬ما‭ ‬تتكلم‭ ‬ولا‭ ‬كلمة‭ ‬لما‭ ‬تشوفها‭ ‬بتضحك،‭ ‬استحقت‭ ‬لقب‭ ‬‮«‬قنبلة‭ ‬الضحك‮»‬‭ ‬عن‭ ‬جدارة‭.. ‬أكيد‭ ‬عرفتها‭.. ‬هي‭ ‬الفنانة‭ ‬المميزة‭ ‬جداا‭ ‬جداا‭ .. ‬ماري‭ ‬منيب‭.‬

القاهرة‭ ‬نورت‭ ‬لما‭ ‬ماري‭ ‬منيب‭ ‬وصلت‭ ‬لها‭.. ‬احكي‭ ‬لنا‭ ‬عن‭ ‬المكان‭ ‬اللي‭ ‬فتحت‭ ‬عينكي‭ ‬عليه‭ ‬قبل‭ ‬ما‭ ‬تيجي‭ ‬القاهرة؟
اهاهاهاااا‭…‬فكرتيني‭ ‬بالذي‭ ‬مضى‭ .. ‬أقولك‭ .. ‬أنا‭ ‬يا‭ ‬ستي‭ ‬اتولدت‭ ‬في‭ ‬بلاد‭ ‬الشام‭ ‬يوم‭ ‬‮١١‬‭ ‬فبراير‭ ‬سنة‭ ‬‮١٩٠٥‬،‭ ‬وفي‭ ‬نفس‭ ‬السنة‭ ‬سافرنا‭ ‬للقاهرة،‭ ‬وسكنا‭ ‬في‭ ‬‮«‬شبرا‮»‬،‭ ‬بس‭ ‬ده‭ ‬ميمنعش‭ ‬إن‭ ‬أنا‭ ‬عندي‭ ‬‮١٩‬‭ ‬سنة‭ ‬و‮٦‬‭ ‬أشهر‭ .. ‬اوعي‭ ‬تنسي‭ :‬D‭ .. ‬ فعلشان‭ ‬كده‭ ‬القاهرة‭ ‬هي‭ ‬بلدي‭ ‬اللي‭ ‬اتربيت‭ ‬فيها‭ ‬حتى‭ ‬لو‭ ‬مكنتش‭ ‬اتولد‭ ‬فيها‭.‬

ماري منيب
ماري منيب

صحيح‭ ‬بدأتي‭ ‬مشوارك‭ ‬الفني‭ ‬كراقصة‭ ‬في‭ ‬ملاهي‭ ‬روض‭ ‬الفرج؟
STOP‭ .. ‬فشرررر‭ .. ‬قال‭ ‬راقصة‭ ‬قال؟! ‬ده‭ ‬الكلام‭ ‬ده‭ ‬بعد‭ ‬ما‭ ‬بابا‭ ‬اتكّل‭ ‬ومات‭ ‬وأنا‭ ‬لسة‭ ‬عندي‭ ‬12‭ ‬سنة،‭ ‬وهي‭ ‬كام‭ ‬حركة‭ ‬عملتهم‭ ‬وأنا‭ ‬حاطة‭ ‬القلل‭ ‬فوق‭ ‬نفوخي‭ ‬بدل‭ ‬من‭ ‬الشمعدان،‭ ‬وبعد‭ ‬كده‭ ‬رُحت‭ ‬على‭ ‬طول‭ ‬لطريق‭ ‬المسرح،‭ ‬تقوموا‭ ‬خلاص‭ ‬تقولوا‭ ‬عليا‭ ‬إني‭ ‬كنت‭ ‬في‭ ‬الأول‭ ‬راقصة؟‭! ‬مش‭ ‬ممكن‭!‬

ماري منيب ومحمد فوزي
ماري منيب ومحمد فوزي

طيب‭ ‬بمناسبة‭ ‬المسرح،‭ ‬اشمععنى‭ ‬المسرح‭ ‬بالذات‭ ‬أكتر‭ ‬حاجة‭ ‬ليها‭ ‬مكانة‭ ‬عندك؟

أمال‭ ‬يا‭ ‬بنتي‭ .. ‬مش‭ ‬أول‭ ‬ما‭ ‬ابتديت،‭ ‬ابتديت‭ ‬فيه؟‭ ‬كنت‭ ‬الأول‭ ‬مع‭ ‬فرقة‭ ‬فوزي‭ ‬الجزايرلي،‭ ‬وبعدين‭ ‬بنته‭ ‬إحسان‭ ‬تعبت‭ ‬شوية،‭ ‬فأديت‭ ‬أنا‭ ‬دورها‭ ‬على‭ ‬المسرح،‭ ‬ونجحت‭ ‬فيه،‭ ‬بس‭ ‬الغيرة‭ ‬بقى‭ ‬تقولي‭ ‬ايه؟‭ ‬إحسان‭ بعد ما رجعت للمسرح، ‬فضلت‭ ‬تضايقني‭ ‬لحد‭ ‬ما‭ ‬سبتلها‭ ‬المسرح‭ ‬باللي‭ ‬فيه‭. ‬بعد‭ ‬كده‭ ‬رُحت‭ ‬في‭ ‬فرقة‭ ‬الكسّار،‭ ‬وبعدين‭ ‬سافرت‭ ‬اسكندرية‭ ‬أشتغل‭ ‬في‭ ‬فرقة‭ ‬أمين‭ ‬عطا‭ ‬الله،‭ ‬هناك‭ ‬بقى‭ ‬اتعرفت‭ ‬على‭ ‬بشارة‭ ‬واكيم‭ – ‬ربنا‭ ‬يبشبش‭ ‬الطوبة‭ ‬اللي‭ ‬تحت‭ ‬رأسه‭- ‬؛‭ ‬قال‭ ‬إن‭ ‬عندي‭ ‬موهبة‭ ‬فوق‭ ‬الخيال،‭ ‬وخدني‭ ‬معاه‭ ‬فرقته‭ ‬اللي‭ ‬كان‭ ‬عاملها‭ ‬مع‭ ‬محمد‭ ‬بيومي،‭ ‬بس‭ ‬بعد‭ ‬كده‭ ‬انفض‭ ‬عقد‭ ‬الفرقة،‭ ‬ورجعت‭ ‬تاني‭ ‬أشتغل‭ ‬مع‭ ‬أمين‭ ‬عطا‭ ‬الله‭. ‬وفي‭ ‬سنة‭ ‬‮١٩٣٥‬،‭ ‬اشتغلت‭ ‬في‭ ‬فرقة‭ ‬الريحاني،‭ ‬وفضلت‭ ‬فيها‭ ‬حتى‭ ‬بعد‭ ‬ما‭ ‬الريحاني‭ ‬مات‭ ‬سنة‭ ‬‮١٩٤٩‬،‭ ‬وشِلت‭ ‬مسئوليتها‭ ‬مع‭ ‬بديع‭ ‬خيري‭ ‬وابنه‭ ‬عادل‭ ‬خيري. ‬

ماري منيب وبديع خيري
ماري منيب وبديع خيري

فاكرة‭ ‬أول‭ ‬يوم‭ ‬ليكي‭ ‬على‭ ‬خشبة‭ ‬المسرح؟
فاكرة‭ ‬كأنه‭ ‬امبارح‭ .. ‬أول‭ ‬يوم‭ ‬طلعت‭ ‬عالمسرح‭ ‬كان‭ ‬عندي‭ ‬14‭ ‬سنة،‭ ‬وكنا‭ ‬بنقدّم‭ ‬رواية‭ ‬فيها‭ ‬أغاني‭ ‬اسمها‭ ‬‮«‬القضية‭ ‬نمرة‭ ‬14‮»‬،‭ ‬المفروض‭ ‬كنا‭ ‬نايمين‭ ‬في‭ ‬الأرض،‭ ‬وفتحوا‭ ‬الستارة،‭ ‬يجوا‭ ‬اللي‭ ‬قايمين‭ ‬بدور‭ ‬العساكر‭ ‬يقوللنا‭ ‬‮«‬فز‭ ‬يا‭ ‬واد‭ ‬انت‭ ‬وهو‭ ‬وهي‮»‬،‭ ‬فنقوم‭ ‬نقف،‭ ‬وبعدين‭ ‬لقيت‭ ‬ناس‭ ‬كتير‭ ‬قدامي،‭ ‬قولت‭ ‬‮«‬يامي‮»‬‭ .. ‬اتخضيت‭ ‬وخُفت‭ ‬من‭ ‬الجمهور‭ ‬ورُحت‭ ‬نمت‭ ‬تاني‭ ‬في‭ ‬الأرض،‭ ‬يقوّموني‭ ‬مقومش،‭ ‬فشدوني‭ ‬بره‭ ‬لغاية‭ ‬ما‭ ‬طلعت‭ ‬عالكواليس،‭ ‬فضلوا‭ ‬يشجعوني‭ ‬بقى‭ ‬علشان‭ ‬أعمل‭ ‬دوري‭ ‬كويس‭ .. ‬تاني‭ ‬يوم،‭ ‬يجي‭ ‬العساكر‭ ‬يقولوا‭: ‬‮«‬فز‭ ‬يا‭ ‬واد‭ ‬انت‭ ‬وهو‭ ‬وهي‮»‬،‭ ‬فوقفت‭ ‬بس‭ ‬فضلت‭ ‬مغمضة‭ ‬عيني،‭ ‬بعد‭ ‬كده‭ ‬بقى‭ ‬خلاص‭ ‬اتعودت‭ ‬وبقى‭ ‬الجمهور‭ ‬يحببني‭ ‬في‭ ‬التياترو‭ ‬اللي‭ ‬هو‭ ‬المسرح‭ ‬يعني‭ .. ‬ولا‭ ‬يخوفني‭ ‬منه‭ ‬أبدا.

ماري منيب وإسماعيل يس
ماري منيب وإسماعيل يس

بما‭ ‬إن‭ ‬الرواية‭ ‬كانت‭ ‬غنائية‭ ‬كمان،‭ ‬غنيلنا‭ ‬كده‭ ‬أغنية‭ ‬منها؟
على‭ ‬عيني‭ … ‬
كنا‭ ‬بنقول‭ ‬فيها‭: ‬‮«‬يا‭ ‬إخواننا‭ ‬بردانين‭ ‬يا‭ ‬أهل‭ ‬الشفقة‭ ‬جعانين‮»‬‭ ‬
يجي‭ ‬العسكري‭ ‬يقول‭: ‬‮«‬قوم‭ ‬اصحى‭ ‬يا‭ ‬واد‭ ‬يا‭ ‬سلامة‮»‬‭ .. ‬
نقوله‭: ‬‮«‬سبنا‭ ‬خلينا‭ ‬نايمين‮»‬

فاتن حمامة - يوسف بك وهبي - ماري منيب
فاتن حمامة – يوسف بك وهبي – ماري منيب
ماري منيب
ماري منيب

بعد‭ ‬المسرح‭ ‬تيجي‭ ‬السينما،‭ ‬احكيلنا‭ ‬عن‭ ‬بداية‭ ‬السينما‭ ‬في‭ ‬حياة‭ ‬الفنانة‭ ‬ماري‭ ‬منيب؟

واحدة‭ ‬واحدة‭ .. ‬قوليلي‭ ‬‮«‬مادموزيل‮»‬‭ ‬يا‭ ‬بنتي‭ .. ‬الله‭ ‬بقى‭ .. ‬الشابة‭ ‬مننا‭ ‬لازم‭ ‬يتقالها‭: ‬‮«‬يا‭ ‬مادموزيل‮»‬‭ ‬أقولك‭ ‬بقى‭ … ‬اللهم‭ ‬صلي‭ ‬عالنبي‭ .. ‬أنا‭ ‬ابتديت‭ ‬في‭ ‬السينما‭ ‬بفيلم‭ ‬‮«‬ابن‭ ‬الشعب‮»‬‭ ‬سنة‭ ‬1934،‭ ‬وبعده‭ ‬بسنتين‭ ‬فيلم‭ ‬‮«‬أنشودة‭ ‬الراديو‮»‬،‭ ‬وفي‭ ‬سنة‭ ‬1937‭ ‬ابتديت‭ ‬أعمل‭ ‬أكتر‭ ‬من‭ ‬فيلم‭ ‬في‭ ‬السنة؛‭ ‬عملت‭ ‬أفلام‭ ‬‮«‬نشيد‭ ‬الأمل‮»‬‭ ‬و«‬الحب‭ ‬الموروستاني‮»‬‭ ‬و«‬مراتي‭ ‬نمرة‭ ‬2‮»‬‭ .. ‬طول‭ ‬حياتي‭ ‬عملت‭ ‬أكثر‭ ‬من‭ ‬200‭ ‬فيلم؛‭ ‬أشهرهم‭ ‬الأفلام‭ ‬اللي‭ ‬عملت‭ ‬فيها‭ ‬دور‭ ‬الحماة‭ ‬زي‭ ‬‮«‬لعبة‭ ‬الست‮»‬‭ ‬‮«‬حماتي‭ ‬قنبلة‭ ‬ذرية‮»‬‭ ‬‮«‬حماتي‭ ‬ملاك‮»‬‭ ‬‮«‬الحموات‭ ‬الفاتنات‮»‬‭ ‬‮«‬الأسطى‭ ‬حسن‮»‬‭ ‬‮«‬حكاية‭ ‬جواز‮»‬‭ ‬‮«‬العائلة‭ ‬الكريمة‮»‬‭ ‬‮«‬اعترافات‭ ‬زوج‮»‬‭ ‬‮«‬هذا‭ ‬هو‭ ‬الحب‮»‬‭ ‬و‭ ‬‮«‬شهر‭ ‬عسل‭ ‬بصل‮»‬‭.‬

 

طب‭ ‬والتليفزيون‭ ‬ملوش‭ ‬نصيب‭ ‬في‭ ‬حياة‭ ‬مادموزيل‭ ‬ماري‭ ‬منيب‭ ‬الفنية؟ ‭ :‬D
لأ‭ ‬بصراحة‭ .. ‬علشان‭ ‬التليفزيون‭ ‬بحس‭ ‬إنه‭ ‬بيعتمد‭ ‬على‭ ‬الحفظ‭ ‬أكتر‭. ‬لكن‭ ‬أنا‭ ‬أحب‭ ‬الجملة‭ ‬اللي‭ ‬أقولها،‭ ‬أقولها‭ ‬على‭ ‬مهلي،‭ ‬وأقسمها‭ ‬وأطلع‭ ‬منها‭ ‬افيه‭ ‬حلو،‭ ‬مثلا‭ ‬في‭ ‬فيلم‭ ‬‮«‬الحرامية‭ ‬الظراف‮»‬‭ ‬اللي‭ ‬اتغير‭ ‬اسمه‭ ‬بعد‭ ‬كده‭ ‬لـ‭ ‬‮«‬لصوص‭ ‬لكن‭ ‬ظرفاء‮»‬،‭ ‬أول‭ ‬ما‭ ‬قولت‭ ‬الافيه‭ ‬بتاع‭ ‬‮«‬بتفهميني‭ ‬أوام‭ ‬يا‭ ‬نسناسة‮»‬‭ ‬كل‭ ‬اللي‭ ‬في‭ ‬الاستوديو‭ ‬قعدوا‭ ‬يضحكوا‭ ‬من‭ ‬قلبهم‭.‬

جمهورك‭ ‬عايز‭ ‬يعرف‭ ‬أكتر‭ ‬عن‭ ‬حياتك‭ ‬الشخصية،‭ ‬فيا‭ ‬ريت‭ ‬تقوليلنا‭ ‬كده‭ ‬اتجوزتي‭ ‬كام‭ ‬مرة؟‭ ‬
يختي‭ ‬عليه‭ .. ‬علشان‭ ‬خاطر‭ ‬الجمهور‭ ‬هقولك‭ .. ‬أنا‭ ‬وحياتك‭ ‬مدوباهم‭ ‬اتنين‭ .. ‬الأولاني‭ ‬كان‭ ‬المخرج‭ ‬‮«‬فوزي‭ ‬منيب‮»‬،‭ ‬اتقابلنا‭ ‬في‭ ‬الشام‭ ‬وأنا‭ ‬مسافرة‭ ‬مع‭ ‬فرقة‭ ‬المسرح،‭ ‬حبينا‭ ‬بعض،‭ ‬واتجوزنا‭ ‬آخر‭ ‬سنة‭ ‬1918‭ ‬أو‭ ‬أوائل‭ ‬1919‭ ‬كده‭ ‬تقريبا،‭ ‬وشِلت‭ ‬اسمه‭ ‬من‭ ‬ساعتها،‭ ‬بعد‭ ‬ما‭ ‬كان‭ ‬اسمي‭ ‬‮«‬مارى‭ ‬سليم‭ ‬حبيب‭ ‬نصرالله‮»‬‭. ‬بعد‭ ‬كده،‭ ‬عمل‭ ‬هو‭ ‬فرقة‭ ‬كنت‭ ‬أنا‭ ‬بطلتها،‭ ‬وجبت‭ ‬منه‭ ‬ولادي‭ ‬‮«‬فؤاد‭ ‬وبديع‮»‬‭ ‬وبنت‭ ‬واحدة،‭ ‬وبالرغم‭ ‬من‭ ‬كده،‭ ‬لوعني‭ ‬الله‭ ‬يرحمه‭ ‬بقى‭ ‬مطرح‭ ‬ما‭ ‬راح،‭ ‬فضلت‭ ‬معاه‭ ‬ست‭ ‬سنين،‭ ‬وفي‭ ‬الآخر‭ ‬راح‭ ‬اتجوز‭ ‬واحدة‭ ‬تانية‭ ‬اسمها‭ ‬‮«‬نرجس‭ ‬شوقي‮»‬‭ ‬لما‭ ‬سافر‭ ‬الشام‭ ‬تاني‭ ‬مع‭ ‬الفرقة،‭ ‬فسبنا‭ ‬بعض‭ ‬بعد‭ ‬العَملة‭ ‬دي،‭ ‬وسبتله‭ ‬الفرقة‭ ‬كمان،‭ ‬ورُحت‭ ‬فرقة‭ ‬يوسف‭ ‬وهبي‭ ‬بس‭ ‬سبتها‭ ‬لأني‭ ‬ملقتش‭ ‬نفسي‭ ‬في‭ ‬التراجيدي،‭ ‬ومن‭ ‬ساعتها‭ ‬وأنا‭ ‬في‭ ‬فرقة‭ ‬الريحاني‭.‬

ماري منيب وابنتها كوثر ليلة زفافها
ماري منيب وابنتها كوثر ليلة زفافها

وعلشان‭ ‬الوحدة‭ ‬صعبة‭ .. ‬يا‭ ‬مراري،‭ ‬اتجوزت‭ ‬تاتي،‭ ‬المرة‭ ‬دي‭ ‬من‭ ‬‮«‬فهمى‭ ‬عبد‭ ‬السلام‮»‬‭ ‬كان‭ ‬أرمل‭ ‬أختي‭ “أليس” ‬الله‭ ‬يرحمها،‭ ‬اتجوزته‭ ‬سنة‭ ‬1937،‭ ‬وفي‭ ‬نفس‭ ‬السنة‭ ‬أسلمت،‭ ‬وسميت‭ ‬نفسي‭ ‬‮«‬أمنية‭ ‬عبد‭ ‬السلام‮»‬‭. والحمد‭ ‬لله‭ ‬قدرت‭ ‬أربي‭ ‬ولاد‭ ‬أختي‭ ‬أحسن‭ ‬تربية‭.‬
https://www.youtube.com/watch?v=NbSmO4tR9qE

يعني‭ ‬يا‭ ‬مدموزيل‭ ‬ماري‭ :‬D،‭ ‬ايه‭ ‬رأيك‭ ‬في‭ ‬الحب؟
اه‭ ‬اه‭ ‬منه‭..‬‭ ‬هالله‭ ‬هالله‭ ‬عالجد‭ ‬والجد‭ ‬هالله‭ ‬هالله‭ ‬عليه‭ .. ‬تسأليني‭ ‬عن‭ ‬الحب،‭ ‬أقولك‭ ‬أحب‭ ‬ليه‭ ‬وعشان‭ ‬إيه‭ ‬أحب‭.. ‬بلا‭ ‬نيلة‭. ‬أحب‭ ‬أولادى،‭ ‬أحب‭ ‬لى‭ ‬فرخة‭ ‬تسند‭ ‬قلبى،‭ ‬سلطانية‭ ‬شوربة‭ ‬تُرم‭ ‬بدنى‭ .. ‬لكن‭ ‬الحب‭ ‬اللي‭ ‬بالك‭ ‬فيه‭ ‬يُقرص‭ ‬وبس. ‬اتفو‭ ‬و60‭ ‬مرة‭ ‬اتفو. ‬لو‭ ‬قابلته‭ ‬أقوله‭: ‬‮«‬انصرف‭ ‬الله‭ ‬لا‭ ‬يسيئك‭ .. ‬أشتاتا‭ ‬أشتوت‭ .. ‬لا‭ ‬تأذيني‭ ‬ولا‭ ‬أأذيك‮»‬‭. ‬جته‭ ‬نيلة،‭ ‬لأ‭ ‬نيله‭ ‬واحدة‭ ‬مش‭ ‬كفايه،‭ ‬جته‭ ‬60‭ ‬نيلة. ‬

https://www.youtube.com/watch?v=_SOSPr8iq54
لو‭ ‬قولتلك‭ ‬إن‭ ‬أنا‭ ‬عايزة‭ ‬آجي‭ ‬أقضي‭ ‬معاكي‭ ‬يوم‭ ‬كامل‭ ‬في‭ ‬بيتك،‭ ‬تفتكري‭ ‬ايه‭ ‬أكتر‭ ‬حاجة‭ ‬أكون‭ ‬مستعدة‭ ‬ليها؟
يا‭ ‬سلام‭ .. ‬تآنسي‭ ‬وتنوري‭ .. ‬ده‭ ‬أنا‭ ‬أفرشلك‭ ‬الشارع‭ ‬ورد،‭ ‬وأستقبلك‭ ‬من‭ ‬وانتي‭ ‬بتخبطي‭ ‬على‭ ‬الباب‭ ‬وأقولك‭ ‬‮«‬‭ ‬هاللو‭ .. ‬مين‭ ‬اللي‭ ‬بيرن؟‮»‬،‭ ‬وأعملك‭ ‬أحلى‭ ‬أكل‭ ‬عمايل‭ ‬إيدي‭ ‬وحياة‭ ‬سيدي‭ .. ‬بس‭ ‬اعملي‭ ‬حسابك‭ ‬إنك‭ ‬هتجيلي‭ ‬من‭ ‬بدري‭ ‬لأني‭ ‬بصحى‭ ‬من‭ ‬الساعة‭ ‬7‭ ‬الصبح‭ .. ‬قال‭ ‬على‭ ‬رأي‭ ‬المثل‭ ‬‮«‬من‭ ‬غسل‭ ‬وشه‭ ‬بعد‭ ‬غداه،‭ ‬يا‭ ‬فقره‭ ‬بعد‭ ‬غناه‮»‬‭.‬

ماري منيب
ماري منيب
ماري منيب وسعاد حسني
ماري منيب وسعاد حسني

بتحبي‭ ‬مين‭ ‬من‭ ‬الفنانين؟
معظمهم‭ ‬بصراحة‭ .. ‬بحب‭ ‬سُمعة‭ ‬وشُكشُك‭ ‬أكتر‭ ‬شويتين‭ .. ‬قبل‭ ‬ما‭ ‬تسأليني،‭ ‬شُكشُك‭ ‬اللي‭ ‬هو‭ ‬شكوكو‭ ‬يعني‭ .. ‬دمه‭ ‬خفيف‭ ‬قوي‭ ‬المضروب‭ .. ‬شربات‭.. ‬

في‭ ‬نهاية‭ ‬الحوار،‭ ‬أحب‭ ‬أشكرك‭ ‬جداا‭ ‬على‭ ‬أكتر‭ ‬حوار‭ ‬ممتع‭ ‬ممكن‭ ‬يكون‭ ‬من‭ ‬نصيب‭ ‬أي‭ ‬حد‭..‬

العفو‭ ‬يا‭ ‬فندم‭ .. ‬ده‭ ‬من‭ ‬ذوقك‭ ‬يا‭ ‬حبيبتي‭ …. ‬إلا‭ ‬صحيح‭ ‬يا‭ ‬بنتي‭ ‬قوليلي‭ .. ‬انتي‭ ‬جاية‭ ‬اشتغلي‭ ‬ايه؟‭ :‬D

https://www.youtube.com/watch?v=NOKPIqEHbY4

 

يُذكر‭ ‬أن‭ ‬آخر‭ ‬أعمال‭ ‬ماري‭ ‬منيب‭ ‬السينمائية‭ ‬هو‭ ‬فيلم‭ ‬‮«‬لصوص‭ ‬لكن‭ ‬ظرفاء‮»‬،‭ ‬وقد‭ ‬توفيت‭ ‬يوم‭ ‬21‭ ‬يناير‭ ‬سنة‭ ‬1969‭ ‬قبل‭ ‬عرضه‭ ‬في‭ ‬السينما،‭ حيث وافتها المنية في الفيلا الخاصة بها في شبرا، ‬بعد أن‭ ‬كانت ‭ليلتها ‬تؤدي‭ ‬دورها‭ ‬على المسرح مع فرقة نجيب الريحاني. ويُذكر‭ ‬كذلك‭ ‬أن‭ ‬الفنان‭ ‬عامر‭ ‬منيب‭ – ‬رحمه‭ ‬الله‭ – ‬هو‭ ‬حفيد‭ ‬قنبلة‭ ‬الضحك‭ ..- رحمها الله – ‬ماري‭ ‬منيب‭.‬

ماري منيب
ماري منيب