خاص لـ«الميديا توداي».. نهــال نبيل: ناس صحابى كانوا بيقولولى سمعتى أغنية مسلسل سارة!!

خاص لـ«الميديا توداي».. نهــال نبيل: ناس صحابى كانوا بيقولولى سمعتى أغنية مسلسل سارة!!
نهال نبيل
نهال نبيل
نهال نبيل

حوار : محمد محمود، عمر زكريا
تصوير : عمرو مجدي


شخصية معملتش حاجة إلا ونجحت وحققت ليها صدي جامد جدًا, بداية من تتر مسلسل سارة, وأغنية «أه منها الأيام», وأغنية «أنا عاشق» مع أحمد سعد وغيرها كتير من أغانى علمت مع الناس, بس محدش عارف إنها معيدة مثلاً فى كلية الإعلام, 
محدش عارف إنها اشتركت فى برنامج ستديو الفن, ناس كتير بيسألوا هى مين دى ومبتظهرش ليه؟!
تعالوا نعرف مين هى نهال نبيل.

كلمينا عن مشاركتك في ستديو الفن؟
كنت حوالى 16 أو 17 سنة، أول حاجة شفت الإعلان في التليفزيون بعد كده قدمت فيه اتقبلت في أول اختبار بعد كده دخلت المسابقة وكسبت الميدالية الفضية. 

ايه اللى كسبتيه غير الميدالية الفضية ؟
اتعاملت مع لجنة تحكيم كبيرة، زى الملحن صلاح الشرنبي والاعلامية سناء منصور والشاعر سيد حجاب واتعاملت مع الاستايلست أمينة شلباية وكانت بدايتي مع مسلسل سارة عن طريق الشاعر سيد حجاب 

كلمينا شوية عن تتر مسلسل سارة ؟
سيد حجاب قال لي انتي بتحبي ياسر عبدالرحمن وأنا هخليكي تقابليه فرحت جدًا وأول ما قابلته قالي خدي الكلام ده وسجليه حالاً قلتله ايه ده قالي غني بس وغنيت «وبنحبك يا دنيا بجد» اللي كانت من انجح الأغاني اللي عملتاها, و معظم الناس مكنتش تعرف مين اللي بيغني لدرجة أن في ناس صحابي كانوا بيقلولي سمعتي الاغنية بتاعة مسلسل سارة ؟!! 
نهال نبيل
ليه درستي اعلام ومدرستيش موسيقى؟
عشان مكنتش حبة ادرس حاجة جوا الموسيقى، عشان أنا كان بالنسبالى الغناء حاجة بحبها بعملها بجانب الدراسة.

شايفة أنك بدأتي صح فى الغنا ؟
آه، لأن فى الوقت ده معظم المغنيين كانوا بيعتمدوا على الشكل، فأنا كنت حريصة أن الناس تعرفني بصوتي مش شكلي وده اللي حصل لما غنيت تتر مسلسل سارة الناس عجبها صوتي من غير ماتعرف شكلي .

من وجهة نظرك شايفة ايه اللي ممكن ينجح الأغنية ؟
الكلمات، كنت شايفه أن الالحان بتشدني للأغنية لكن، الجمهور الفترة دي بيتشد للكلمات أكتر. 

احكلنا عن مقابلتك مع الراحل وديع الصافي ؟
أستاذ حلمي بكر هو اللي خلاني اقابله و بمجرد ما دخلت عليه غنيت قلتله «أنا بحبك جدًا» أول ما خلصت غُنى قال لي «اسمك ايه ومنين؟» وقال لي «صوتك فيه تربية وأخلاق» انا اتفاجئت أنه بيعرف شخصية اللي قدامه من صوته..! 
نهال نبيل تتر مسلسل بطل سينا توقعتي نجاحه و جوايزه ؟
متوقعتش خالص نجاحه وتكريمي في قطر و البحرين

ممكن نشوف نهال نبيل مذيعة أو ممثلة ؟
بالنسبة للمذيعة ممكن جدًا بس نفسي اشتغل فى مجال الموسيقى, ومتحمسة جدًا لفكرة برنامج تركزعلى فريق عمل الأغنيه مش المغني بس, أما بالنسبة للتمثيل كل الناس بتقولي تنفعى ممثلة عشان بحب أقلد, لكن أنا شايفة نفسي مطربة .

خالد نبيل ساعدك ازاي ؟
خالد اخويا، هو أكتر واحد في حياتي وقف جانبي, هو اللي وزعلي البومي كله ومأثرش معايا في أي حاجة, «دكان شحاتة» كان عن طريقه, و «آه من الأيام» خالد اللي رشحني لأيمن بهجت قمر، يعني من الاخر خالد سبب كبير أوي في نجاحي .
نهال نبيل شايفة ايه أكتر حاجة فخورة بيها و أكتر حاجة ندمتي عليها ؟
فخورة جدًا أن الناس عرفتني بصوتي قبل شكلي, أنا ندمت جدًا اني مستغلتش نجاح مسلسل سارة .

إيه هواياتك غير الغُنى ؟
بلعب بيانو, برسم, كان نفسي أدخل فنون جميلة بس اتظلمت في امتحان القدرات .

طب لما دخلتى كلية الاعلام كنتى حاطة فى دماغك إنك تبقى معيدة ؟ 
لأ، مكنش في دماغي خالص بس كنت دايماً بسعى للإمتياز في كل المواد عشان المكافأة اللي باخدها من والدي.
نهال نبيل نهال نبيل فين كمان خمس سنين ؟
شايفة نفسي حاجة عالية اوي وفي حتة تانية خالص ان شاء الله ولو محققتهاش ممكن يحصلي حاجة.

إيه اعمالك الجاية ؟
فى ألبوم شغالة عليه من 2009، وقفت شوية علشان الثورة وبعدين رجعت اشتغل فيه تاني وخلصته في 2013, في 2014 بدأت أدور على شركة توزعلي الألبوم, لأن انا اللي انتجته.

الألبوم هينزل إمتى ؟
شهر فبراير في عيد الحب إن شاء الله

تتمنى ايه في 2015 ؟
الالبوم ينجح, اخلص الماجستير, كل اللي حواليا يفرحوا بيا وأكون وجهة مشرفة ليهم.


نهال نبيل

التعليقات

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *