تامر أمين يهاجم «المنسحبة من منتدى الشباب»: «أفورة ملهاش لازمة.. بلاش تنطيط» !!

هاجم الإعلامي تامر أمين، الدكتورة نُهى عبدالكريم، خبيرة سياسات الطاقة بالولايات المتحدة الأمريكية، وصاحبة واقعة الانسحاب بجلسة «مستقبل تغير المناخ»، التي عُقدت ضمن فعاليات منتدى شباب العالم على مدار الأيام الماضية.

وقال أمين إنها – نهى- تعاملت بطريقة خاطئة مع مديرة الجلسة الإعلامية ليندا عبداللطيف، مضيفا: «قاصدة تعمل شو، أفورة ملهاش لازمة».

واستكمل أمين، خلال تقديمه حلقة اليوم السبت من برنامج «الحياة اليوم»، عبر فضائية «الحياة»: «آداب الحوار تقتضي الالتزام بنظام الندوة، ولا أتحدث إلا بعد أن يُوجه إليّ سؤال، ومدير الجلسة يكون منسق ذلك، ماينفعش أعمل إني عنتر زماني وأتكلم وماحدش يقاطعني وأخلص كلامي وقت ما أنا عايز أخلص، هي تقدر تعمل كدة في أمريكا؟ مفيش كدة في أي حتة في الدنيا».

وأشار الإعلامي إلى أن «نُهى» هاجمت منتدى الشباب عبر حسابها بـ«فيسبوك»، قبل واقعة انسحابه من إحدى جلساته، وذكر أنها قالت: «هكتب انطباعي عن المنتدى في الآخر، لكن ملاحظة في النداوات اللي بيحضرها السيسي إن الطبال دايمًا موجود، دي مشكلة شعب وأصبحت حاجة تقرف على فكرة، وشكلها وحش عالميًا»، معلّقًا: «إحنا شوفنا كل الجلسات ومحدش كان بيطبل والكلام كله كان محترم وموضوعي جدًا، وبعض الجلسات كان فيها انتقاد للدولة والرئيس بيسمع ويرد».

وواصل أمين حديثه: «عارف إن الدولة فيها طبالين كتير، لكن إيه اللي حصل في المنتدى يقول إن في تطبيل، وبعدين دلوقتي الشعب بقى حاجة تقرف؟ هل النعرة دي بيتعلموها في أمريكا؟ انتي مولودة في كاليفورنيا وإحنا مش عارفين؟ يا ريت نعيش عيشة أهلنا، أه بتاخدي دولارات وشغالة في أمريكا لكن جاية تنططي على الشعب دلوقتي؟ بلاش ننسى أصلنا ونتنطط على أهلنا».

وشهدت مدينة شرم الشيخ، الأسبوع الماضي، تشديدات أمنية مكثفة مع انطلاق فعاليات منتدى شباب العالم، تحت رعاية الرئيس عبد الفتاح السيسي، وبحضور عدد من رؤساء دول العالم وشخصيات عالمية بارزة، وبمشاركة نحو 3 آلاف شاب وفتاة، ينتمون إلى أكثر من 100 جنسية من مختلف أنحاء العالم.