بالصور..شاهد أشيك سائق أتوبيس نقل عام في مصر..عشريني وحاصل على البكالوريوس

بالصور..شاهد أشيك سائق أتوبيس نقل عام في مصر..عشريني وحاصل على البكالوريوس
0135

تداول نشطاء مواقع التواصل الاجتماعي صورة لشاب مصري في العشرينيات من عمره يعمل كسائق على أوتوبيس نقل عام بالقاهرة.

ونشر النشطاء صورة الشاب المصري وتحمل قصته بعد أن أجرت معه إحدى الراكبات التي شاء القدر أن تستقل الأوتوبيس بعد فشلها في العثور على مواصلة “تاكسي”.

الشاب وفقا للصورة والتفاصيل التي أوردتها “زهراء الألفي” التي التقطت له الصورة، يبدو في أوائل العشرينيات مرتديا أفخم الثياب وتظهر في وجه علامات الثقة بالنفس وشدة حبه لعمله.

تقول زهراء عبر حسابها بـ “فيسبوك” الشاب ده في أوائل العشرينات من عمره… شاء القدر إني أشوفه النهاردة بالصدفة البحتة بعد ما ركبت أوتوبيس الهيئة العامة عشان أروح..و يشاء ربنا إني أقعد في الكنبة الأولى و أكون قريبة جداً من مقعد السواق… و طبعاً فوجئت باللي انتم شايفينه… شاب صغير جداً… بصراحة شكيت فيه في الأول… وبعدين لفت نظري هيئته و لبسه (لابس ساعة و جزمة شيك جداً)… قميص و بلوفر من بعيد ..و كمان أدبه في الكلام مع الركاب… ظهره المفرود و ثقته في نفسه”.

وتضيف “غصب عني لقيتني بتابعه… بصراحة تاني… صقر قاعد قدام الدريكسيون… تركيز عالي و سواقة باحتراف لدرجة ان عينه على رجلين الركاب صعوداً و نزولاً علشان مايوقعش حد…!!! طول الطريق (رغم الزحمة و الرخامة و أسئلة الركاب المتكررة) مافيش حاجة نرفزته و لا تلفظ بأي كلمة مش ولابد…ماقدرتش أحوش نفسي من إني أسأله و أتكلم معاه…الشاب ده معاه بكالوريوس من معهد عالي بعد الثانوية…الشاب ده بقاله أربع سنين شغال سواق على أتوبيس…الشاب ده مبسوط بشغله في الهيئة و فرحان بالمرتب اللي بياخده اللي اعترفلي بصراحة انه مرتب كويس…الشاب ده راضي انه شغال في الحكومة…الشاب ده نموذج للاجتهاد و مثال لقيمة العمل… لما قلتله أنا فخورة بيك وبكل اللي زيك… كان في منتهى السعادة لما قلتله إنت سواق محترف…كان في منتهى الاعتزاز بنفسه لما قلتله ممكن أصورك و أنزلها على الفيس… كانت الدنيا مش سايعاه

لما قلتله ربنا يباركلك و يفتح عليك… كانت ابتسامته تتوزع على الناس كلها”.

وعلقت Mervat Salah ” ياريت كل الشباب يعمل كده ويفهم إن الرزاق كريم بس اجري ورا رزقك”.

وقال Marwan Harb ” هشيرها احتمال تحرك اى حد من الى قاعدين على القهوة”.

وكتبت Soha Nawar “ما شاء الله عليه ..وإيه المشكلة بيسوق أتوبيس ..كفاية أخلاقه” فيما رد

Kareem Taha وقال ” أنا عايز أشتغل سواق أتوبيس نقل عام”.

ويرى Ahmed Sadek أن السائق ” نموذج للشباب اللى عايز يشتغل ويبقى عنده مستقبل .. حتى ولو مكانش اللى بيحلم بيه”، فيما يرى Hany Mjd أن ” وراء كل رجل عظيم واسطة”.

وقالت Asmaa Samieh “انا شفت بعيني برا مصر في اكتر من بلد سواقين الأتوبيسات العامة وهيئتهم الشيك وأسلوبهم وأسلوب الركاب معاهم .. الفكرة في الاحترام برا السواق معتز بمهنته وعارف إنها مهمة أوى للناس والركاب مقدرين وعارفين انه مهم جدا فى حياتهم .. الكل بيحترم بعض..جزاك الله خيرا على نقل النموذج ده .. بصيص أمل”.

سائق شاب

التعليقات